Dw i wedi bod eisiau gweithio yn y sector gwyrdd cymunedol ers tipyn, gan ddilyn gwaith Ynni Cymunedol Cymru, YnNi Teg, Datblygiad Egni Gwledig a grwpiau lleol eraill i mi yng Nghaernarfon. Dw i wastad wedi cael fy nharo gan y gwerthoedd sy\u2019n rhan o\u2019u gwaith \u2013 cydweithio, rhoi pobl yn gyntaf, a gweithio nid-er-elw.<\/p>\n\n\n\n
Mae cael y cyfle i ymuno \u00e2 th\u00eem Cartrefi Clyd wedi dod ar yr amser gorau i mi. Mae\u2019n teimlo fel cyfle unigryw ar gyfer yr hyn sy\u2019n digwydd heddiw. Rydym yn gweld y sector ynni\u2019n datblygu\u2019n gyflym ynghyd ag effaith andwyol tanwyddau ffosil ar biliau ynni. Does gennym ni ddim dewis amgen ond i fod yn fwy effeithlon o fewn ein cartrefi a defnyddio ynni adnewyddadwy ar gyfer defnydd bob dydd. Rydym eisiau i gymunedau Cymru bod yn fwy hunan-gynhaliol ac yn llai dibynnol ar ffynonellau ynni allanol. Yn anffodus, nid oes llawer o gefnogaeth ar gyfer cartrefi a theuluoedd a chymunedau i wneud hyn, felly dyma yw bwriad Cartrefi Clyd.<\/p>\n\n\n\n
Pan welais i brosiect Cartrefi Clyd am y tro cyntaf, roedd popeth yn gwneud synnwyr. Rwy\u2019n weithgar yn fy nghymuned leol fel cadeirydd pwyllgor y neuadd bentref, ac rwyf wedi cael cynigion nifer o weithiau i wella\u2019r adeiladau drwy gynllun ECO4. Yn anffodus, fel nifer o rai eraill, nid ydym yn gymwys i dderbyn y gefnogaeth.<\/p>\n\n\n\n
Mae mwy a mwy ohonom yn ystyried sut fedrwn ni leihau ein h\u00f4l-troed carbon wrth i enghreifftiau o\u2019u heffeithiau erchyll luosogi bob blwyddyn. Ond mae\u2019r bwlch mewn darpariaeth a chyngor ar gyfer y rheiny ohonom sydd eisiau cymryd camau i ddatgarboneiddio ein cartrefi wedi gadael nifer heb gyfeiriad. <\/p>\n\n\n\n
Dyma sy\u2019n gwneud Cartrefi Clyd yn wahanol. Mae\u2019n bosib bod rhai wedi clywed am brosiectau \u00f4l-osod blaenorol sydd heb gymryd y gofal sydd gennym ni yn Cartrefi Clyd, gan arwain at niwed i gartrefi a rhagor o gostau drud i bobl. Mae ein haseswyr yn ystyried pob rhan o gyd-destun y cartref \u2013 ei leoliad, beth yw\u2019r hinsawdd sy\u2019n ei amgylchynu, sut mae pobl yn byw ynddo, y deunyddiau mae wedi adeiladu ohonynt, ac ystod eang o ffactorau eraill. Maent wedi cymhwyso\u2019n llawn, ac yn byw ac yn gweithio\u2019n lleol i\u2019r ardaloedd rydym yn eu gwasanaethu \u2013 Carnarfon, Hermon (Sir Benfro), Caerdydd a\u2019r Drenewydd ar hyn o bryd. Ein gobaith yw i ehangu ein gwasanaeth fel bod mwy o\u2019n cymunedau ni\u2019n gallu gwneud y mwyaf o\u2019n gwasanaethau.<\/p>\n\n\n\n
Rydym yn annibynnol, ac wedi ein ffurfio o sefydliadau cymunedol mae pobl yn eu hadnabod ac yn ymddiried ynddynt. Dyma pam rwy\u2019n credu bod Cartrefi Clyd yn darparu rhywbeth unigryw.<\/p>\n\n\n\n