Wedi'i bostio ar

Pump rheswm da i ôl-osod fy nhŷ… a pheidio prynu cwch

Pump rheswm da i ôl-osod fy nhŷ… a pheidio prynu cwch

Ystyried ôl-osod eich cartref, ond yn teimlo’n ansicr? Mae ôl-osod eich cartref yn fuddsoddiad, mae’n gofyn am amser, egni ac arian. Ond ydy’r buddion o wneud hynny yn fwy na phrynu rhywbeth mwy moethus – rhywbeth fel cwch efallai? Wedi’r cyfan, mae’r gost o ôl-osod fy nhŷ tua’r un faint, felly pam lai? Dyma 5 rheswm i ôl-osod fy nhŷ a pheidio prynu cwch.

1.Cost tanwydd

Mae gan ein tŷ wres canolog nwy sydd oddi ar y grid a lle tân sy’n derbyn coed a glo yn yr ystafell fyw. Mae fy ngwraig a minnau’n gweithio o gartref mewn dwy ystafell ar wahân, ac nid oes gan y naill na’r llall unrhyw wres o gwbl. Mae’n iawn yn yr haf gan ei bod hi’n gynnes braf, a does dim angen gwres, ond mae meddwl am brynu potel arall o nwy am £100 y tro yn fy ngwneud i’n sâl. Roedd potel yn costio £28 ddim yn hir iawn yn ôl. Mi fydd yn para ychydig wythnosau os byddwn ni’n rhoi’r gwres i fynd am awr yn y bore ac awr gyda’r nos, ac yn cael cawodydd neu fath. Ar droeon eraill bydd rhaid i ni oddef bod yn oer.

Mae glo a choed tân yr un peth. Mae llosgi lympiau o garbon am £100 ar gyfer tua pedwar bag, fydd yn para tua pedair wythnos fel bod ein stafell fyw yn gallu bod yn gynnes am ychydig oriau’n unig, yn dda i ddim.

Efallai y dylen ni symud i Sbaen a bod yn gynnes, ond ’da’n ni’n eitha licio Caernarfon!

2.Ble mae fy arian i’n mynd?

Pan dw i’n prynu botel o nwy o Calor i gynhesu fy nghartref i, ble mae’r arian yna’n mynd? O ble mae Calor yn cael eu nwy? Ar ôl ychydig o ymchwil cyflym, mae’n ymddangos fel bod Nwy Petrolewm Hylifedig (LPG) naill ai’n cael ei gynhyrchu yn un o 6 burfeydd olew y DU, neu’n cael ei fewnforio i un o’i 5 pwynt mewnforio. Dosberthir symiau mawr o LPG yn uniongyrchol at ganolfannau dosbarthu ledled y wlad. Golyga hyn fod fy arian yn mynd at burfeydd olew, a chwmnïau olew anferthol sydd efallai neu efallai ddim yn talu trethi teg yn y Deyrnas Gyfunol. Dull da o wario arian?

3.Hunan-gynaliadwy?

Oni fyddai’n braf gallu defnyddio byd natur i greu’r holl ynni ry’n ni eisiau yn ein bywyd bob dydd? Ni fyddai angen prynu nwy na glo na phetrol byth eto. Byswn i’n gallu rhoi paneli solar ar fy nho a gosod batri. Gallai’r haul wefru’r batri yn ystod y dydd, ac yn y nos, gallwn ni gael y gwres ymlaen (wedi’i bweru gan bwmp gwres), cael bath twym, gwylio’r teledu a byw ein bywydau – a’r cyfan yn dod o’r batri. Gallwn ni hyd yn oed gael car trydan a gwefru hwnnw hefyd. Gall ein tŷ fod yn bwerdy – a gallwn ni waredu’r boteli Calor yna a dod yn hunan-gynaliadwy. Dim mwy o filiau!

4.Yr Amgylchedd

Wnaeth unrhyw un wylio “Colli Cymru i’r Môr” yn ddiweddar ar S4C? Roedd yn rhaglen ryfeddol, a dw i’n ei hargymell yn fawr. Dywedodd bopeth sydd angen i chi ei wybod am yr amgylchedd a lle’r ydyn ni gyda charbon. Yn fyr, dylem ni fod yn mynd mewn i oes ia newydd, a dylai ein planed fod yn oeri, ond mae’r gwrthwyneb yn digwydd.  Mae’r blaned yn cynhesu oherwydd bod yr haen osôn sy’n diogelu ein amgylchedd yn teneuo ac yn galluogi rhagor o belydrau poeth o’r haul i gyrraedd y tir. Mae hyn yn arwain at gapiau polar yn toddi, tanau a sychder. Mae hyn i gyd wedi cael ei achosi gennym ni’n llosgi tanwyddau ffosil. Mae’r swm o garbon yn yr awyr wedi bron â dyblu mewn tua 200 mlynedd, a bydd pethau ond yn gwaethygu os ydyn ni’n parhau ar y trywydd rydyn ni.  

Dw i’n aml yn meddwl beth fydd pobl ymhen 500 mlynedd yn ei feddwl amdanom ni’n llosgi ein planed ein hunain tra bod ynni am ddim bob man o’m cwmpas.

5.Ydw i eisiau cwch, go iawn?

Wel, i fod yn on onest, ydw. Dw i dal eisiau cwch. Ond ys ydw i’n edrych i mewn i ba cwch y dylwn i brynu, dw i’n dod nôl at y ddaear fel petai. Wedi’r cyfan mae injan petrol 8 litr yn gallu neud tua 2 filltir i’r galwyn – nid y peth mwyaf e ffeithlon o ran tanwydd. Efallai y bysen i’n gallu ei roi yn yr ardd er mwyn eistedd ynddo.  

Ydw, dw i’n bod bach yn wirion. O ddewis, fysai’n well gen i fod yn gynnes a chyfforddus yn y gaeaf gan ddefnyddio fy ynni fy hun wedi’i gynhyrchu gan fy mhaneli solar fy hun a pheidio â chefnogi cwmnïau tanwydd ffosil anferthol sy’n gwneud eu ffortiwn o bobl gyffredin sydd angen cynhesu eu tai a’u teuluoedd.

Ond lle ydw i’n dechrau? Dylwn i brynu paneli solar, pympiau gwres, dechrau insiwleiddio?

Heb gyngor iawn, bydd yr arian fyswn i’n ei wario yr un mor wastraffus â’r syniad yna am gwch.  

Dyma’r rheswm pam mai Cartrefi Clyd yw’r cam cyntaf mewn ôl-osod. Maent yn arbenigwyr yn y maes, maent yn gallu asesu fy nghartref a darparu adroddiad sydd wedi’i deilwra i fi a sut dw i eisiau byw. Maent yn gallu darparu llwybr clir sy’n lleihau’r risgiau, ac yn sicrhau fy mod i’n gwario fy arian yn ddoeth.

Os ydych chi fel fi, ac yn ystyried ôl-osod eich cartref, gallwch ddechrau arni drwy archebu asesiad drwy Cartrefi Clyd.